26 april 2021

Wan seiker dei a ben de fanowdu fu mi go bro mi ede. Datmeki mi rei go langalanga na Zuiderpark fu suku wan sdonpresi, fu puru prakseri. Mi parker mi oto na a bun bigi geri bana, di e prodo ini a park. Furusma no ben de. Mi feni wan moi presi fu sdon. Fu farawe mi e syi tu yongusma e waka kon. A fasi fa den e broko kon, yu e syi taki a man e suku a uma. Mi ai no abi tapun. Di mi syi fa den e du, wantenwanten mi bigin firi fa den kapelka e meki pkin ini mi ondrobere. Mi memre mi fofelobi (liefde op het eerste gezicht). Mi firi bun. Fu mi prisiri, den kon sdon krosbei pe mi ben kan syi den, yere san den e taki. Arki den switi wortu, di a man e spiti kon, fu fromu a uma. A uma e seki nanga en skin, a lobi a freiri. Mi kaka mi yesi. Mi prei no syi, mi prei no yere, ete nanga mi buku ini mi anu, mi e meki neleki mi e leisi. Ondro-ondro mi e pip luku, arki den. Tongo e nati mofobuba. Bosi e meki b’bari.
Wantenwanten den pi. Wan moi blaka-w’wiri puspusi lon psa. Mi skreki sote, spesrutu fa mi nanga puspusi no abi sâk. A sori a uma lobi puspusi. Ne a uma aksi na man: ‘Yu lobi puspusi? ‘sortu puspusi yu lobi?”
A man aksi: ‘Omeni sortu puspusi de? Mi no lobi ala puspusi, ma te mi sabi fa den de, dan mi sa taigi yu sortu wan mi lobi. Mi no sabi ofu mi sa dede gi den, yu no kan sabi, kande mi sa flaw gi den.
Yere a uma: “Puspusi lai. Yu abi kalikali wan, langa w’wiri wan, bosu w’wiri wan, pirpiri-wan, smara fesi wan, penpeni-wan, bigi- ede wan, rediwan, blakawan, blakaweti-wan, barba wan, boktuboktu wan, syatu wan, katfisi puspusi.”
Mi sdon e arki. Mi e aksi misrefi san a man wan yere. A no yere nofo? Bika alaleisi te a uma kari tra sortu puspusi, a man e naki en tongo e fasfasi a uma. A uma en bobimofo e gro. Omoro a man e fasi na uma omoro a uma e kari puspusi nen. Mi yere nen fu puspusi di noiti mi no yere.Mi angri fu sabi, san a man sa piki na uma, bika a man lai tyori. Mi mofo e beti fu taki wansani. Nanga drei-ai a man aksi a uma:
“Yu abi wan puspusi? Fa yu e kari yu puspusi, san, suma a gersi?”
Nanga brad’kanti a uma piki: “Mi abi wan kalikali katfisi puspusi, a no abi w’wiri a e smeri fisi, ma a e prisiri mi switi.” A man piki: “Mi no wani puspusi. Mi no lobi den sortu puspusi disi. Mi no lobi a tingi fu den wipi.”
Ne yu syi, a man opo, nanga ala en lostu, libi a uma na baka nanga en katfisi tingi.