28 oktober 2020

Wanlo difrenti sortu fosten tori e lolo ini mi ede. Tapu son momenti mi e denki den granbigisma fu mi. Te den ben ferteri den fostentori mi no ben poti yesi arki. Mi no ben feni en fanowdu fu sabi den tori efu skrifi den. Mi ben abi tra sani na mi ede. Mi yongu, mi e kisi bobi, w’wiri e gro na presi pe mi no ben ferwakti. Mi e meki modo fu boi e meki pssst, froiti, firi kapelka ini mi bere. Mi e prisiri fu syi fa mi skin e lepi, mi ben feni en moro switi, dan e sdon arki mi granm’ma yonguten tori. Mi granm’ma ben wani un sdon arki en tori. Mi ben du leki mi e kaka mi yesi, ma nowan dropu fu dati. Tide na dei mi e mandi fu di mi no ben yesi den tori. Mi e sari dati wanlo fu den bigisma dede, nanga den koni nanga sabi. Koni nanga sabi, fu mi ben kan leri, moro fu mi rutu en inbere nanga fanowdu.
Owruyari e doro. A so mi nanga wan wrokomati e ferteri fu den owruyarigwenti fu un blakasma, a pisten di wi ben libi ini Sranan. Langaten mi ben wani sabi, suma kon na tapu a denki fu wasi swit’watra nanga bromki nanga sososo, tapu owruyari. Mi e memre di mi ben pkin, den owruyari swit’watra. Mi no ben man ferstan fusan- ede mi mu wasi nanga a kowru redi watra. Ofa mi granm’ma ferteri taki na fu wasi a hebi fu a yari di e psa de, gwe, a no ben hari mi. Tide mi sabi taki na den bigisma fu den sma di den teki meki leki srafu, kon nanga a koni. Den tyari a koni fu a kondre pe den ben libi bifosi den wetman f’furu den. A gwenti tan. Tide na dei mi sabi sortu watra de, oten yu e wasi disi watra, efu dati watra. Mi e hori na ai, taki ala w’wiri abi en koni, nanga en switi. Don no man sondro koni. Ala gwenti abi en denki, ala yorka abi en fasi.
Owruyaridei ala oso e meki en watra tapu en eigi fasi. Pon e meki, kuku e baka, nyan e bori. Oso krin. Nyun garden. Mi bri taki mi granm’ma ben meki tu sortu watra, swit’watra nanga hebiwatra. Fruku m’manten, efu wan dei na fesi, a prapi nanga den watra ben meki, poti sdon ini a was’oso. A heri oso smeri owruyari. Wan fu wan un ben kisi wan wasi. Te now ete mi e yere den wortu fu mi granm’ma te a ben wasi mi. Fu doro na a kba, nanga wan godo mi granm’ma ben teki wan smuru watra ini en mofo fu taki: “Luku go na westen.” Dan nanga wanlo modo a e bron a watra na yu tapu, fu yu ede kon miti yu futu. Yu tnapu e beifi, a watra kowru. A e taki mofo; fu pasi mu opo gi mi, fa ogri mu wai, fa Gado mu luku mi. Mi e arki, ke mi pôtiwan, mi no sabi sortu pasi a e taki. A no kon na ini mi ede, fu aski en sortu pasi, fes-seipasi efu bakapasi. Baka den wortu, a e teki ete wan smuru, taigi mi: “Luku go na oosten”. Dan agen a e bron a watra na mi tapu. A no ben lobi, te mi e drai, fu a watra no kisi mi. A e warskow fu tan tnapu. Te a no e go leki fa a wani, we, a bro e gwe nanga langa. Leki pkin yu na noti e taki. Mi syi fa mi granm’ma e prisiri. A pisten mi no sabi pe oosten de, lastan westen. Mi bri taki mi granm’ma srefi no ben sabi.
Bika sonleisi a e kari westen, oosten, efu oosten, westen. Noiti mi no yere mi granm’ma taki fu luku go na zuiden efu noorden. A sani musu abi wan bodoi, oosten, na pe son e opo, westen na te sondongo. Kande fu di zuiden na tapsei, Gadosei, noorden na ondrosei sobun d’dibrisei, mi granm’ma no ben wani mi drai luku datsei. Mi no sabi efu na tru. Mi e prei mi poku e dansi.
Mi granm’ma ben de wan trutru bigisma granm’ma. Mi ben lobi en. Sondro fu mi sabi a leri mi wanlo. Safsafri mi e suku fu hari a sabi kon na loktu. En prenki e prodo ini mi oso.
Baka a wasi, ala di mi pkin, mi skin e seki, ma mi firi lekti. A firi firi fri. A oso srefi ben bro wan switi tiri fasi.
Srefi di mi doro Ptatakondre mi m’ma ben meki en beki swit’watra. A libi ben switi. Te twarfu yuru alasma de na den eigi oso, e du den famirmansani. Ini Sranan baka a oloisi naki twarfu yuru a begi, begi, na go winsi den birti wan bun nyunyari, nyan dringi wansani e sutu finpeiri. A pisten ini Sranan owruyari nowansma e pina. Alasma e sutu bombel. Den moro pinawan e sutu den moro bigi bombel.
A momenti dati, nowansma abi feyanti. Birti nanga san yu abi trobi e luku skoinsi efu yu sa seki anu nanga den.
Ini Ptata, fosten, baka twarfu yuru, dans’oso e wakti mi. Fosi a oloisi naki twarfu yuru mi titafèt kba fu go na dan. Na leti na ini a dansi, yu ben smeri suma wasi en swit’watra, hebiwatra efu suma no wasi. Mi no ben lobi te mi e smeri, mansma e smeri w’wirwatra. Te yu smeri a smeri wantenwanten yu e sabi fa a man de. Te na wan grofu man, di e fon uma, efu wan switi man di e korkori uma. Disi a no l’lei. Mi de na ini wan dansi e yere wan man e taigi a trawan, fa a watra fu en hebi moro di fu a trawan. Den man bigin kruderi san den poti efu no poti ini a watra. Mi sdon na seisei e luku sari den. Yu ben abi wantu man, di ben spoiti na tapu a w’wirwatrasmeri, switsmeri. A smeri dati ben broko yu noso. Wan fisti tingi smeri. Dan, te wan man di e smeri so, kon teki yu fu dansi, yu mu hori yu noso fu no flaw mindri a dansi. Datmeki mi ben lobi den owruyaribakadinadansi. Ini den dansi yu no e smeri sma di wasi swit’watra, hebiwatra efu tra sortu watra. Yu e smeri sweti. A wasi e wasi baka a dansi. Ete disyari, mi nanga yu kan krin un bere poti fowruw’wiri na ini. Bakadina dansi no sa de. Broko sweti nanga tanfasi dansi owktu no sa de.
Ma fa no fa mi sa suku wan fasi fu dansi a dansi. Mi matrasi no safu.