Wantu yari psa, mi ben abi wan bigisma taki nanga Libi nanga Dede.
Te now ete a boskopu fu dede e hori mi na ai. Kande na fa mi e yere fa wanlo sma di lontu mi e dede so frafra. Moi-, koni-, srapu sma di no kba den wroko ini a grontapu fu un dyaso.
Mi taki nanga dede….
Dede, mi no ben sabi taki mi bo prakseri yu sofuru. Mi wani taki nanga yu. Yu kan gi mi pkinso fu yu ten? A no taki mi no e lespeki yu, mi sabi, mi nanga yu a no speri, ete yu kan gi mi a okasi fu kari yu na yu fesnen. Te mi e kari yu na yu fesnen mi e firi moro lekti, dan te mi e kari yu na yu bakanen.
Wakti, wakti……kande toku mi musu kari yu na yu bakanen, bika yu owru moro mi, yu tranga moro mi.
Dede sonten mi e aksi misrefi suma efu san na yu futru. A psa tu dei di mi taigi wansma, mi feni yu wan lagi dagu. Mi no e saka mi ede gi yu. Mi feni yu wan bakru bubu sondro fesi, yu no abi yeye.
Nomo a sma teki yu prati. A opo yu so hei. A dyompo go na loktu fu teki mi skin. A sma no ben lobi fa mi e nangra yu na tapu a piru (brandstapel).
‘Nônô’, a sma piki mi: ‘Na wan fu den yepisma, wan bun bubu fu Gado. A e safu strei.
Mi kaka misrefi fu piki en: ‘ Fa a bubu, disi kan de wan yepisma fu mi Gado’? A bubu disi e prefuru, a no abi no wan dropu sar’ati gi trawan. A no abi enpati. A e puru sani di mu lepi. A e koti grasi di mu gro, pe watra de fanowdu a e seni en mati nanga en dreiten soro. A sani disi no kan? Te yu e luku lontu. San yu e syi? Luku ala den sma di e begi fu fanga wan dropu watra na tapu den drei tongo. Luku den sma di no abi nowansma fu brasa. A sani dati no kan toku?
A bubu disi e gi mam’ma brok’edesari. Yu mag fu sabi, mi ati ben bron so kfarlek tapu yu. Tedati mi proberi fu ferstan yu. Mi aksi pardon, na a sma di ben taki so bun fu yu, fu di mi ben ando yu so.
Ini wan momenti mi denki kenki. A srefi neti yu psa ini mi dren. Mi no ben firi switi fu syi yu. Mi ben wani lowe fu na dren, go kibri bun farawe. Yu ben de wan bubuspuku. Ini a dren wansani psa nanga mi. Mi tuka nanga a fisiun fu wan dedeskin. Wantronso mi e prisiri ini a dren. A moro mi e dukrun ini a dren, wansani e hari mi na seisei. A momenti di mi ben wani opo mi mofo fu taki wansani, wanhet leki wan peiri wan blaka faya brei mi.
Mi kisi misrefi di wansma b’bari: ‘ Gwe yu dede, gwe yu bubu, a no sreka gi na patu. A no seti ete gi sapa. Mi no wani a syi yu fesi’. A ben de tu sten moksi ini wan sten. A sten fu mi Gado nanga fu wansma di mi sabi. Sondro knoru yu drai yu baka. Yu wai gwe ini wan olo ini wan dungru kamra. Ne mi wiki fu na dren. Mi ben breiti taki yu no smeri mi. Yu gwe leki wan sar’ati spuku. Tangi fu di yu libi mi. Ofa mi sabi, na yu wroko, mi e begi yu fu no meki yu wroko, tyari famiri sari nanga famiri ini nowtu.

‘Man’ nanga ‘uma’, mi mofomofo fu tide!
Dri dei psa ini a coronatrangaten (coronacrisis) fu tron ministri efu lantisekretarsi, tunaneigi sma meki sweri taki den no pramisi nowansma noti, no kado no tra sortu gudu. No ondro kibrinen, no nanga l’lei. Den no gi, teki efu sa teki tyuku. Nanga opo yeye spirit, den sa wroko na den kontendu (toekomstplannen) fu a kondre, a so den sweri.
Mi syi someni moi sma e prodo na kownu fesi, kownu di tnapu leki wan krakatiki e seki en ede. Koni sma di pramisi fu sorgu bun, teki frantwortu gi a kondre, fu munde te nanga sonde. Sweri meki nanga tu finga na loktu, e aksi Gado fu yepi. Ete, sma ben de di no kari Gado nen. Alafa, mi no abi trobi fa den fesi tan, efu den gersi mi, no gersi mi, efu den kumbat’tei beri, pe di fu mi beri, fa den meki den sweri, solanga den abi a krakti fu tyari a frakti, sondro fu prei nanga den makti, nèks no fowt. Bigi lespeki gi a sma di meki sweri ini en eigi tongo. Mi no ben sabi sa a taki, ma mi grabu en. A no opo finga na loktu, sobun a no kari Gado nen. A gi lespeki en kumbat’teitongo. Na so yu e syi. No boko yu tongo!
Kba, mi ferwondru, fa den nyunsusma, prati den sma ini, ‘Uma’ nanga ‘Man.’
Den no sabi taki (primisi mi taki) moro sani de leki punke nanga toli. Sma di no de, no wani de, man noso uma? Sma di no sabi suma na den ete, e ondrosuku den eigi de? A no lanti srefi skrifi tapu papira taki wi musu fu gi lespeki a fasi fa sma e firi fa den wani de, fa den wani wi kari den. A no so taki psapapira nanga son dokumenti no e aksi moro, efu yu gebore, nanga wan punke efu nanga wan toli. A no uma, man nanga x, skrifi tapu dokumenti? Lanti wani taki sma mu man de fa den wani de. Datmeki a de wan bun prenspari sani efu wi, a maskapei, brasa den. Natrasma, efu Natra – a so mi e kari non binair, transgender nanga so moro, – sma di no e firi densrefi man efu uma, den wani kari trafasi. Ini Ptatatongo a tori fromu, bika yu abi den wortu ‘Zij’ nanga ‘Hij’. Natrasma no wani kari so. Sowan fu den wani kari, ‘lij, vij, het, mens, persoon.’ No gi den leti? Ini
Sranantongo furu problema no sa de ini a pisi disi. Na so mi e denki. Ini Sranantongo wi e kari alasma, ‘A’ noso ‘En’. A no abi trobi efu yu na man, uma efu natra. Kenki de na mofodoro. Srefi tapu twalètdoro, den e puru prenki fu man nanga uma. Alasma kan go plasye pupe pe a wani. Baka dri yari, efu a regeren no fadon, kande den nyunsusma sa kon na tapu a prakseri fu no taki soso fu ‘man’ nanga ‘uma’. Kande alasma di tnapu na tapu stupu, sa kisi a lespeki fu kari a fasi fa a e firi ensrefi. Dan kande alasma mu kisi wan kalikei (tatoeage/sticker) tapu den anu, pe sori suma efu san na den. Na fu den opo den anu nomo, fu meki sma syi san skrifi na tapu. Bruya no sa de. Te alasma sabi fa alasma wani kari a, kalikei kan figi efu kari gwe. Nomo dan wi no kba ete,……..bika a sweri dati no meki ete.

2 januari 2021

Mi lespeki matibuku-kompe,
A yari 2021 opo. Fu mi kumbat’tei-yeye mi e winsi yu ala bun di yu wani gi yusrefi. Tan fa yu de. Teki trawan leki eksempre, ete no suku fu de fa trawan de. Bika yu na yu, nowansma kan de leki yu. Grantangi fu di yu teki ten, fu leisi den langa tori di mi e prati.

Ini a tori fu tide, baka son wortu, mi poti wan aksimarki. Na den wortu di mi kisi na mi ede. Wortu di no bruya mi edetonton nowan dropu. A de na yu, san yu wani du nanga den.
Brasa mi lobi! Lespeki ala firi! No bruya fu na tiri!

A kansa fu na firu. Het muteren van het virus?
A grontapu grontapu en gron tapu. Gro’tnapu, gro tapu!
Moro leki esdei a dyomposiki di e kwinsi grontapu-yeye, e dyompodyompo nanga ala en koni, fu kansa? (muteren?) ini moro moi kloru, tranga dyomposiki kansa-pkin. A firu no lobi bobimerki. Leti na un mindri, ini a skinfin’olo? (pori? fu un fokofoko, (longen) a brek ensrefi, meki nesi, fu seti presi fu gi opo-oso. A koni moro koni, bika a sabi nanga soso ai a no de fu syi. Datra lupu? (loep) de fanowdu. A nabi trobi suma wani swari, grabu efu fanga en kari. A no e prati, efu skrifi ini en tensistema?(kalender) suma kan wakti fu swari, suma wani wakti, suma no abi anu fu fanga, ete suma no kan wakti fu tyari. A no e bada. Solanga yu wani yepi seti a nesi, a e opo en moi kloru oso. Nomo, te yu swari yu sa mu tyari. Tyari kan de hebi pina dede, sondro famiri di sdon, nanga sari-fesi sei yu at’osobedi. Tyari kan de tranga insei strei, hebi feti, pe famiri, no kan de na yu sei, mu tapu densrefi ini oso, ini karanten? (quarantaine) fu a siki no kisi okasi fu panya en nesi efu eksi. A smeri fu a nesi e tapu yu smeri. Te now ete a de na wini anu. Nanga en prakseri, en boskopu gi grontapu, kba a sori un wan finga. Solanga un no grabu en heri anu, a no sa tapu. A e feti en trefu.
A tap’sikigunya? (s.faksen n.vaccin)di sabiman meki so gawgaw, pe wanlo sma, mi tu, e frede fu teki, na wan fu en trefu.
Awansi fa sabiman meki a dresi fu spoiti hesbiten, bifo ini den moro swaki wan, a e tan feni wan fasi fu kansa. A abi en tyo? (navigatie). A lobi a nyan di wi e langa kon. A firu e prisiri fa wi no sabi fa fu stotu en wanhet. Yepi fu stotu en, sani di lanti aksi unu fu du, un no wani du. Wi feni den sani di lanti e aksi f’feri. Tan’osokoni? (intelligente lockdown) e gi ede-atiwinti. Sonsma feni, den no man nanga a markitikilibi? ( anderhalve? – meter samenleving). Den no man libi sondro bosi, brasa nanga fasi. Trawan feni, waka aladei nanga mofopangi (mondkapje) e tapu bro, fu di fokofoko no e kisi nofo oksi?(zuurstof). A sani e siki den tu. Anudran (handalcohol) srefi e nyan gwe den nangra. Edew’wiri-olo e kibri loso. Wawanleisi mi e bruya tu.
Prakser’denki e kenki mi prakseri, fu lespeki lanti denki, fu no go nowan presi. Datmeki mi e tan na oso, fu no yere nowansma en takru koso!

2 oktober 2020

Mi lespeki mati, fa yu e meki en? Nanga mi a e go safsafri, mi e trusu en. Mi e begi Gado fu a corona no grabu yu nanga mi. Den boskopu di mi e yere fu sma di kisi corona, difrenti. A wan e ferteri taki a hebi, trawan e ferteri, a no nèks, a gersi wan sortu agrabu (griep). Na mi na wrokope, furu sma kisi en, efu abi en. Fu di mi no e sdon nanga trasma ini wan kamra, mi e begi fu a psa mi kamradoro. Te a de fanowdu mi e wroko na oso. Te now ete mi abi koloku. Gado kribi mi! Tide mi no skreki fu yere, a man di e prei basi fu grontapu, kisi en. Na fu un syi, corona no e puru nowansma. Disi na srefisrefi wan eksempre fu “b’ba suku, b’ba feni b’ba tyari. Awansi fa mi frede a corona, wawanleisi mi abi a firi, a gersi corona tyari wan bun. Wansani mi breiti, mi nafu seki anu nanga sma, mi nafu bosi sma drileisi. Bosi sma di e libi foktu na mi seimofo. A so esde mi bro tori nanga wan daina man. Soso wansani mi no lobi fu en. Fosten te mi ben taki nanga en, mi ben fisti fu luku en ini en fesi. A ben taki bun sani, ma mi no ben wani taki langa nanga en. Sobun mi no ben yere fa en takdenki tranga. Mi ben gunya te a ben taki. En mofo ben naki dampu. Te mi ben taki nanga en mi ai ben hari go na en tifi. Nanga den tifi ini en mofo, a noiti ben sa wini wan tif’wega. Mi no e broko nowansma saka, di mofo gersi wan brokopranasi bika mi no sabi fa dati du kon. A kande wansma frede tifdatra, efu a no abi moni fu go meki en tifi, efu mankeri meki a lasi en tifi. Sobun no hori mi na ati. Disten, mi no e gunya moro, mi no e fisti gi en moro, mi e luku ini en ai. Mi lobi taki nanga en. Ne mi kon syi fa den ai fu en moi. A yongu abi moi sribikamra ai. Esde ben de a fosleisi, di mi taki moro leki wan yuru nanga en. A tori ben switi. Di mi kisi misrefi, di mi yere bun, mi kon ferstan, taki na suku a yongu e suku mi. Dorodoro a ben aksi mi fu go nyan wan mofo. A pisi dati mi no ben yere bun, mi no ben wani yere. Mi ben aksi misrefi fa a sa kaw a kawmeti di a lobi so, nanga dati tifi ini en mofo. Es’esi mi ben syatu a tori. Now di a aksi mi, mi firi fa den kapelka e frei e meki pkin ini mi ondrobere. Mi taigi en, te wi miti baka mi sa taigi en, efu mi wan go nyan wan mofo. Mi sabi kba, denki no de fanowdu. Mi nanga en no sa go nyan. Bikasi mi no wani kisi trobi nanga nowansma na oso. Ini a taki di wi e taki, a aksi mi, fa a du kon, mi taki so langa nanga en. Fosten mi ben syatu en, mi no ben abi ten gi en. Mi no wani a firi wanfasi, mi tron awaridomri, mi l’lei wan l’lei. Mi taigi en: ‘A asprak di mi ben abi, no kon, sobun mi ben abi ten.” Ma mi l’lei dati mi bribi mi l’lei. Mi no ben abi asprak nanga nowansma. Mi no wani taigi en dati na di a weri en mofopangi, (mondkapje) mi ben kan poti yesi arki moro bun, san a e taki, no na tapu den fisti tifi ini en mofo. So mi kruderi nanga misrefi, corona ogri, ma a e tyari bun tu. A e tapu syèn. Mofosyèn. Na begi mi e begi yu, no lon go luku ini spikri fa yu tifi tan. A no dati meki mi ferteri a tori. A tori disi a no wan l’lei, na tru tori. Ma mi e sari owktu, fa yu no man syi mi nanga mi moi redi mofobubaferfi (lippenstift).                                                                                   

23 september 2021

Tide fruku m’manten mi nanga wan bun mati ben prenkikonkru (videobellen). A san switi fu taki nanga wansma, dan yu e syi en fesi. Corona tyari takru ma a tyari bun tu. Corona prati sma, ma owktu a tyari sma kon na wan. A bondru. Sani di mi noiti ben wani du, mi e du now. Mi e prenkikonkru sodra a kan. A mati fu tide abi wan switi opo fesi. Tapu a fruku m’manten en mofo ben lusu. Yu ben kan syi dati a sribi bun. Awansi fa mi e taigi en, mi no abi ten, toku a wani mi arki en. Mi e arki fa en sten en lolo leki botro. Wawanleisi a e naki nanga en tongo. Mi no sabi fusan-ede. Ma a no e malengri mi yesi. A pisten mi frigiti a yuru, spesrutu fa a e taki so switi, moi wortu di e bruya mi. Di a syi wan mira e kroipi tapu a tafra a feni wi mu blo mira-tori. A e ferteri. “Mi lobi mira. Mira tranga moro libisma. Den sabi fu wroko nanga libisma. Mira no e meki trobi, den e yepi. Mira noiti no e dyarusu. Efu yu aksi tin bigiskinman fu skoifi a udu fu dyaso go drape, den abi wan yari fanowdu. Aksi tin mira, fosi yu drai, a udu de na en presi.” Mi no sabi san fu taki. Soso luku mi e luku en. Ini en tra libi a wani de wan mira. Datmeki a no e kiri mira. A e fertrow mira moro libisma. Mi kon weri fu na mira tori. Mi wani tapu a taki. Ma dati na a f’feri te yu e prenkikonkru, sma e syi san yu e du. Mi no wani a syi taki mi mu e go du trasani. Sondro fu mi wani a bigin nanga wan tra tori. Wan taya-tori. Mi ben musu fu yere, omeni sortu taya a sabi. A bigin nanga sneisitayasupu, a supu di a bori esde. A waka go na ini a kukru fu sori mi a patu tapu a onfu. Wan bigi patu supu. A sani gi mi wan lafu. Mi aksi en efu oiti a yere wan Sneisi ferteri a bori blakamansupu. Fusan-ede wi e kari a taya sneisitaya. Na dati mi no ben musu fu aksi. Mi kari a yongu na en nen. A go sdon let’opo fu ferteri mi fusan -ede den e kari sneisitaya, sneisitaya. A pisi dati mi no arki. Mi no ben abi ten fu arki. Mi opo fu sori en , mi mu lusu. Mi abi tra sani e go du. “Sdon, no gwe ete’. A fasi fa a taki a feni mi. Mi sari en. Mi go sdon. Wan pkin fowru ini mi ede, syusyu ini mi: “No libi en so, arki en. A abi wansma fanowdu di e arki en. Ne yu syi mi go sdon. Mi kon yere fu den difrenti sortu taya. Dasitaya, pontaya, krastaya. Na a krastaya switi a tori. A yongu dyompo fu krastaya te go miti a pisten di a ben libi ini Sranan. A pisten di a ben law den uma. A yongu heri skin bigin seki. Mi klari fu arki e luku fa a e prisiri nanga ensrefi. Nanga pirtifi a ferteri fa a ben drai ini Sranan: “Mi ben law den. Te yu ben ferteri uma, taki yu e wroko na Afobaka efu Suralco, dati wawan ben sari, fu hari den kon na ini yu tyaka. Sonleisi mi ben denki taki na oni mi tyari na mi g’go so. Didyonsro mi ferteri yu fu den mira. Wedan mi nafu ferteri yu morofara. San ben psa nanga a oni. Sonleisi mi ben mu go kibri gi den uma. Moro tori de. Mi fosi motrobaisigri ben de wan KS. Yu no sa sabi, a pisten na yowka yu ben plei. Bogobogo mi ben fanga den uma. A KS ben gi mankeri, sma ben kari en ‘Kom Sterven’. Baka di mi rei wan Zundap. Ala den motrobaisigri di ben de a pisten ini Sranan mi rei. Yu ben abi, solex, mobilette, sparta, ma fespa, nanga honda ben de tu. Mi ben bai mi empi na Ramaker, Gerritsen efu Kersten. Pablo empi na a kol / kwedyo (kraag) fu a empi ben taki a tori. Mi ben lai kenki. Nanga mi safuskin bruku, mi swift finimofos’su mi ben gi uma mankeri. Yu ben abi den man nanga bradi futu, a finimofo s’su ben malengri den futu. Mi futu ben smara. Problema no ben de. Wawanleisi srefi mansma ben meki moi ai gi mi. Te mi ben seti mi w’wiri na prupangi, mi ben siki den. Mi switsmeri oldspice, yu syi, te den smeri mi, na moro oni. A so den mira e beti mi. Dan, te mi ben tnapu na seisei e smoko mi tabaka, philip morris, nanga lucky strike, na den tu tabaka mi ben smoko, den uma ben monyo. (krioelen) Mi no ben smoko white ox, blakat’tei efu anchor. A pisten mi ben hebi. Luku fa mi kon tan now. Fa yu feni mi?’ Yu e aksi mi fa yu kon tan. Te now ete yu fiti ai. Ma wansani e mankeri. Yu e gi lobi, ma yu no abi moni. Uma no e luku s’sosaka man. Uma wani coronaproof man. Mi breiti fu di yu ferteri mi fu fosten. A du mi bun, ma now mi mu gwe.”

18 september 2020

Fodeiwroko psa, mi wikènt bigin freida, tidem’manten. Bifo corona kon teki un skin, yu syi freida, dan mi ben bigin seti mi fu go na dan. Spesrutu fa mi no e wroko freida. Nownow mi lustu go dansi. Dansi mi tanfasidansi, mi souldansi, pe yu kan sribi ini a man anu. Ke, a no kan. Tanfasidansi no e dansi moro.
A ben de wan switi sani, te a poku switi, nanga ai di tapu yu e dansi.  Mi syi fa brenisma e dansi soul nanga ai di tapu. No denki mi fisti, no mandi mi, mi no e teki brenisma e meki spotu. Na wan eksempre mi e gi. Te yu sabi a poku, te yu firi a poku, yu e dansi e singi sondro fu syi. Yu grabu mi? A no ala man lobi te yu e singi na en yesi.
Wan man  taigi mi di mi ben singi: ‘ Yu no kan tapu yu mofo.   Te yu e singi, mi no man dansi fa mi wani. Mi wani konsentrèr mi na tapu a poku. Te mi e uku mi wani a tiri. Efu yu wani singi, go aksi a dj fu tapu a poku, dan yu kan singi, fu alasma yere yu.” Na don’t take it so hard, fu Johnny Robinson, ben plei. Ma mi no ben singi Ingristongo mi ben brokobroko en ini Sranantongo. Mi e singi: “No teki en so tranga’. Mi bri na den wortu bruya a man. Ini a dansi mi atibron tapu a yongu. Ne mi taigi en: “Di yu ben suku mi, na singi mi ben singi ini yu yesi. Yu ben ferteri fa mi sten moi, fa yu lobi te mi e singi, fa mi ben switi yu. Now di yu futu beti gron, yu no wani yere fa mi e singi. Yongu tan fu yu.” Leti mindri a poku, mi lusu en, libi en tnapu. Mi tyala. A syen sote, suku fu go na loktu gi mi.   Mi no span nanga en.

Mi e teki wan dyompo”

Noiti yu no dansi nanga wan man di e singi, ma a no sabi den wortu. A e singi wanlo b’baw? A e singi b’baw, ma a sabi a dansi. Den man dati de tu. Mi sabi wanlo di lobi a singi.
Yu sabi taki furusma e dansi a poku ma no e ferstan den wortu. Na so a poku fu R.B Greaves“ Home to Stay”kisi mi. Dorodoro mi ben denki taki a man e kon na oso fu kon tan nanga en m’ma. Na di mi arki bun, mi grabu taki, wan dede man e ferteri fa sma e kon luku en fa a d’don dede ini en kisi. Wan frak fu den sortu poku de, di e tyari yu ede gwe.  

Te yu yere a sawnt, yu no e prakseri den wortu.
Libi fa a poku di switi, te yu go na den dansi, te yu ben abi wan krin skinkloru, yu sabi, yu sa dansi. Nomo efu yu skinkloru blaka leki mi, yu ben mu tyari koloku efu wan man kon teki yu fu dansi. Bika a pisten ini Sranan nanga ini Ptata mi blaka brada no ben luku den blaka sisa. Den ben lobi krinkloru, gratiw’wiri uma, nanga bigi bowtu, bigi bele. San den syi nanga ai, na dati e teri.
Mi e memre a dei, disi a no wan anansitori, a tanfasidansi tapu wan bun bigi sodro ini Aga. Mi nanga mi s’sa teki waka. A dansi ben span. Uma ben lai. A wan uma ben moi moro a trawan. Ontiman ben lai tu. Mi nanga mi s’sa, un no ben prodo leki adyanski-yagayaga (vogelverschrikker). Wi blaka ete wi no abi agra ini un ede. Un fesi e brenki. Un krosi e taki. Poku e prei, wi lostu dansi. Mi blaka brada e waka psa unu so, fu go teki krinkloru uma fu go dansi e bai dringi gi den. Wawanleisi wan e kon teki un fu dansi. Nanga ala un koni wi e sdon luku fa den man e kwiri fu krasi. Wi e teki un fatu na den tapu. A wan di kon teki mi, meki mi firi en kandratiki wantenwanten.
Mi hari go nanga baka meki a sabi, mi no lostu drei fisi.

Neti e tapu, uma e gwe, mansma e tan. Mi nanga mi s’sa no firi fu gwe ete. A poku ben switi fu arki. Di wi luku lontu wi syi, moro furu blaka-uma sdon. Ne pas den blaka brada firi fu kon teki un fu dansi. Den kon tnapu ini un birti e meki moi ai. Nowan fu den, langa un wan grasi watra. Mi nanga mi s’sa ben poti na unu ede, fu skotu den, te den kon teki una. Wan baka trawan wi skotu. Denki san ben psa efu yu go na ladies night’.
Mi de seiker, kande yu di e leisi a tori disi e memre den switi fosten oso dansi. A ben de wan ten.

Fosi mi tapu nanga a tanfasidansi tori, mi pramisi wan fu den mati wansani. Tra-esdei mi skrifi fu den swa-alentenworon nanga den dot’ipisoro.  Mi mati wani sabi san mi e bedul. We mi mati, ik bedoel daarmee, in een simpele uitleg: “ De aanwezigheid van ongediertes en ziekten veroorzaakt door zure regen, en de vervelende gevolgen voor de mensheid.”