Arki san teki mi.
26 oktober 2020
Tra-esdei mi sdon e bron mi ede, mi skin ben wêri. A momenti di mi wan teki wan dyonko, wan fsiti bèl mi tapu mi osoteilefown. Bifosi a bèl mi tapu mi wakawakagengen. A no yere mi. Mi ben saka a sawnt, fu gi mi ede pkinso bro. Mi no ben wani teki a osoteilefown, ma di a e tan go, mi teki. Mi fsiti e taki, ma en bro e suku fu tapu. A tori fromu. A uma bruya sote. San na a tori. Mi fsiti e hori nanga wan trowman. A no now den e hori, na bun langa yari kba. A man trow-uma no sabi taki a abi wan skadiladi na seisei. A trow-uma no ben man kisi pkin. Kepôti, a no sabi dati en masra abi wan pkin nanga en buitenfrow. A trow uma na wan moi tiri uma. A no e go nowan presi. Baka wroko, a e go langalanga na oso, fu go seti a patu, fu en masra kan switi en mofo.
A frede fu de mindri sma. A no lobi bradyarisma, nanga wanlo dyugudyugu. A e gagu lekti, ma a no abi trobi. En masra pramisi en, awansi a no man kisi pkin a nafu frede, en nanga en, na soso dede kan prati den. Den na te dede . A noiti sa go suku wan tra uma. A trow uma e bribi en masra. A lobi en masra. A e bribi alasani di a e ferteri en. Srefi en l’lei’.
Na wantu dei frikowtu e trobi mi fsiti, ete a no wani go na datra. A feni taki na wan lekti agrabu.(griep) Leki fa a kon na so a sa gwe tu, na so a e hori ensrefi na spotu.
A pendresi e yepi en, na so a taigi mi. Mi no aksi sortu pendresi a e swari. A trowman e tan pakpak na en yesi fu a go na datra. Efu a no go, a kan skrifi en tapu en bere, a no sa kon moro, bika a no wani siki. Moro kfâlek a no wani siki en trow-uma. Ne yu syi a go tèst ensrefi. Baka tu dei a yere dati a abi corona. Awansi fa a sabi taki a e siki, a l’lei gi a man. A no taigi en wantenwanten taki na corona a abi, a ferteri dati na wan hebi frikowtu. Na baka tu dei, di en skin ben kon swaki moro nanga moro, a ferteri en. Ini a pisten a trowman bigin siki tu. Ensrefi go tèst. A sori, ensrefi abi corona. En trow uma srefi e siki. Pkinsopkinso mi fsiti e kisi krakti. A no siki langa. Te yu yere, sma di corona grabu e kisi mankeri nanga den fokofoko (longen) a no mi fisti.
Sensi a man e siki mi fsiti no syi en. A no e yere en sten. A angri syi en, spesrutu fa a abi en fanowdu. En ondrobere e kwinsi en. A no man ferstan, fusan-ede a no e yere noti fu a man. Datmeki a bèl mi, fu aksi mi san a mu du. Efu mi wani bèl, a man fu aksi en fu a bèl en. A angri yere en sten. Mi fsiti, mandi, bruya fu di mi taigi en, “Mi no e go bèl nowan enkri man. Tapu nanga yu krasi. A no yu masra.” Ne a anga a teilefown na ini mi yesi. A heri dyonko di mi ben wani dyonko gwe. Ne syi mi opo.
KROFAYA KROMANTI 'TANPE' 
Hahaha a tori disi no makkelijk gi no wan enkri sma.
lobi pasi fara. bika pori wan tra wang libi na moro takru en bita ati
bika wan uma mu abi lespeki en warti gi eng srefi.
wan uma habi makti.
Bika a uma disi denki eng srefi en wan poti wan tra wang ini problema
na bun dati yu no do sa aksi. bika a sa musu abi pasensi ta yuru doro fu si eng sma man.
pori yu sribi en rostu
LikeLike
Mi lobi fa yu piki. Sani e psa na grontapu di fromu. Fu dyonsro sribi switi.
LikeLike
Mi lobi den buku fu yu
Mi é lesi den nanga prisiri
Yu abi wan prisiri opo fesi, wan switi lafu
Grantangi dati mi leri sabi yu
LikeLike
Ik kan geen srangna tongo schrijven
Maar ik kan het wel lezen je boeken zijn heel interessant
I hoop meny persone Will read it and injoy it like me keep up they good work
LikeLike
Dank je!
LikeLike
Mi luku yu website, bun sani yu é skrifi. Mi e leri furu fu yu.
Mi abi lespeki fu yu
Gado blesi
LikeGeliked door 1 persoon
Grantangi
LikeLike
Lobi sisa, bigi grantangi fa yu é tyari un Sranan tongo waka. Mi Bigi omu, Leider wijlen, Benedictus, Anselmus, Eduwardus Felter, alias The Mighty Botai, na a fosi wan san tyari Sranan tongo, elegaal dya ini Nederland tapu a Arki Dosu ( Radio sobu ) later na St Ouderen Radio Sranan, miki tidé un Sranan tongo é taki grati hari tapu din Sranan Radio dya ini Nederland. A slogan fu Botai, na, Sranan tongo, na mi Ma tongo, fu san edé mi musu freedé fu taki mi tongo??? A winsi fa a kronkron na mi Tongo. A spikriiiii, a sa tan fasi. Lobi sisa, mi lobi a fasi fa yu é go ini a dipi fu un tongo. Bunfuru koloku, fu prati moro sabi gi wi baka pransun. Lobi gi yu nanga ala yu Lobiwan. Tan bun, all the best, be blessed, fu sisa Nadia Felter.
LikeLike
Mi lespeki sisa,
wan pkin fowru pik mi fu go luku fa wan sisa e tyari wi sranang tongo go na hey. Mi no dray dray, mi dyompo wantron go luku.
Grantangi fu den boskopu san yu e skrifi.
Mi sa tan ori baka gi yu en sosrefi mi sa prati a nyunsu fu moro kondreman kon luku en teki prati.
Nanga lespeki nanga lobi.
masra Reggie Becker
LikeLike
Brada Reggie, lespekifasi mi e seni odi.
Grantangi fu di yu teki ten fu skrifi den wortu di e bobi mi.
Na fu den pkin fowru disi, wi mu abi en. Na den na wi tyo. (navigatie) Wawanleisi den stowtu, ma moro furu den no e seni un ini dungru takru busi. Mi e du muiti fu prati san mi sabi, wortu nanga koni di den bigisma fu mi e taigi mi, e syusyu, fu prati nanga trawan. Bigi tangi fu di yu wani yepi fu prati a boskopu. Bifo mi tapu, buku de ete fu bai. Fu tapu, mi e seni lobi, bobi mi brasa. Krakti fu opo wi tongo. Krofaya
LikeLike