3 oktober 2020

Mi lespeki mati, Tide mi wani prati mi sari nanga yu. Mi e aksi fu gi mi pkinso fu yu ten. Mi no sa mandi efu yu no abi ten. Mi no sabi fa yu dei e waka. Tide na gi mi wan spesrutu dei. Mi e sari, mi e krei, bika tide ben de mi m’ma en koti-kumbat’teidei, en friyaridei. Disi na owktu a dei di mi m’ma en m’ma, mi granm’ma, beri. Dei leki disi yu no e frigiti. Mi bron mi kandra, sdon kisi misrefi, fu luku a dedebanti nanga den dedeprenki fu mi m’ma. Mi arki den singi di mi m’ma ben lobi. Singi fu Mahalia Jackson. A moro mi e arki den wortu fu den singi, a moro mi e firi fa mi m’ma e fasi mi so safri, nanga en tranga wroko anu. Anu di safu now moro skapu-w’wiri (wol). Mi broko. Ete a prenki fu mi m’ma e kisi libi, e gi tiri ini a yeye fu na oso. Skrifi e gi mi krakti fu psa a dei. Futru, mi e misi mi m’ma. Yu di no abi m’ma moro, sabi a firi. Efu mi ben kisi a okasi fu soso yere en sten, syi en moi blaka grati fesi, mi ben sa breiti. Sonleisi mi e dyarusu tapu sma di e dede, bikasi den sa syi mi m’ma fesi bifosi mi. Ma mi e wakti mi ten. Gado sabi san a e du. Mi e begi en fu no fanowdu mi ete, bika mi fanowdu na grontapu ete. Mi sdon e luku lontu ini mi oso. San sa musu psa nanga ala den moi sani ini a oso, te mi no de moro? Fu puru prakseri fu dede nanga sari, wanlo sani e lolo ini mi ede. Mi ede furu nanga tori, di mi wani poti tapu papira. Safsafri, sondro fu mi wani, mi e skrifi mi di fu seibi buku ini mi ede. Wortu e kori mi. Mi m’ma ben lobi moi wortu tu. A ben kari vagina, “syupa”. “Heb je jouw syupa al gewassen? Laat niemand bij je syupa komen.” A memre switi. Disten den sani disi no e aksi moro. Awansi yu na m’ma, a no yu sâk, efu syupa wasi efu no wasi. A syupa-tori meki mi wawan e lafu leki wan lawman. Mi ben sa winsi a aksi mi efu tide, mi wasi mi syupa. San mi sa pikin baya? A so mi e denki den moi wortu fu a ten disi. Aladei nyun prakseri, nyun denki, libisma di e kenki, grontapu nanga en kenki, a wer srefi e kenki. Mi e memre den wortu: corona, covid 19, mofopangi, anudran, anus’su, ukuhari, ukutyari, tyupu, ukufbuku, hairakibri, taikiri, ufe, mi tra mi, tumi, tyo, prenkikonkru, nanga ete wan tu wortu fu a ten, ini san wi e libi. Den wortu e freiri ini mi mofo. Ne mi doro na a bigi man Rutte nanga en ‘intelligente lockdown.’ Mi pôti m’ma, a sa bo man libi nanga ala den nyun wortu. A sa bo man libi nanga na:’Tan na oso koni’ efu ‘Tan’osokoni’. (intelligente lockdown) fu Rutte. Tyupu (appen) a ben man. Ma san ben sa psa efu a kisi tyupusiki efu tyupumankeri (appongeluk.) Mi no sabi fa fu du, en owktu no ben sa sabi. Te mi e yere son wortu, a e lan na mi te mi brokobroko en ini mi eigi tongo. Mi freiri taki, brokobroko en ini pkinmoni. Wedan, na so mi e proberi. Sonleisi a pkinmoni tranga fu broko. Ma mi e feti nanga en. Mi abi wantu wortu pe mi e broko mi ede. Neleki fa un sabi mi no abi heiskoropapira fu go diki fa wortu e kisi libi, ete nanga ala mi don, mi sabi a tyori fa fu diki. Mi sabi dati a no a fasi, ma mi feni en mi fasi. Mi lobi mi fasi. A so mi m’ma ben abi en tyori fa fu du son sani. A ben du en sani en wawan. Tyori di tide na dei mi brada, s’sa nanga mi kan nyanprei. Mi m’ma dede, ete en fesi e flaka mi aladei ! Grantangi fu di yu teki yu ten, fu leisi te na a kaba.                             Lobi mi, no lobi mi. Mi lobi yu! Krofaya                                                    krofayakromanticom.wordpress.com