Na a libi fu Kraswati, wan Hindustani uma, nanga en pkin Kumari, wan dogla uma, nanga den sma di ben lontu den. A libi fu den no ben waka switi, a ben tyari langa maka. Kraswati ben yonguyongu di en p’pa seri en gi wan man di owru tutron moro en. Feifi burkaw ben de a pai. Kraswati no ben wani trow nanga a man, nomo a ben musu fu. Kraswati poti na en ede taki a wani trow nanga wan Blakaman. Ofa a taigi en p’pa taki a wani trow nanga wan Blakaman, a p’pa no ben yesi en. Noti no ben yagi. Fu dati-ede a suku fu kiri ensrefi. A tan na libi tangi fu en m’ma nanga a man di a no ben wani leki en masra. Te fu kba a doro ini kolera, pe a bigin kisi lobi gi wan blakaman di ben stuka fu kon tron yeyedatra. Na a brada fu a blakaman disi o tron Kumari p’pa. Dri yari baka a dede fu Kraswati, Kumari sa trow nanga Hesdy. Hesdy wani feras Kumari, so a meki mofo nanga wantu komediman fu kon ferteri dyowk tapu a boda. Fu di Hesdy sabi taki den man kan meki grofu spotu, a wani skoro den sortu dyowk den musu meki, nanga sortu wan, den no musu fu meki srefisrefi. Hesdy nanga Kumari trow, nomo a boda no waka leki fa den ben wani seti en. Sondro fu den ben ferwakti mankeri, malengri nanga dede brasa den, dei nanga neti.